Notification

Posts Categorized: Jugend

Ofschloss-Feierlechkeete vum Centenaire

Virun 100 Joer – den 2. Mäerz 1920 – sinn d’Diere vun der Gemengebibliothéik vun Esch offiziell opgaangen. Genau 100 Joer méi spéit, den 2. Mäerz 2020, stoung den Ofschloss vum Centenaire vun der Escher Bibliothéik aus dësem Grond ganz am Zeeche vun enger „Journée Portes Ouvertes“.

D’Villa Deitz, déi d’Bibliothéik zënter 1946 beheemegt, gouf fir dësen Dag extra erausgefiizt an dekoréiert. E neie Banner vir um Balcon huet d’Gäscht begréisst, Loftballonen un der Paart hunn hinnen de Wee gewisen, Loftschlaangen hunn d‘Trapenhaus verschéinert an op der Pinnwand am Gank huet eng Liichterketten d‘Fotoen aus deene vergaangenen 12 Méint presentéiert.

Den Ufank vum Dag huet eng „Mystery-Liesung“ gemaach: Fir déi jonk Nowuessdetektive gouf et e besonnesch urgente Fall ze léisen: eisen Erzéier a Photograph Jan gouf gekidnapped! Séier hunn sech kleng Gruppe gebild, déi mat detektiveschem Geschéck iwwerall an der Bibliothéik no Indice gesicht hunn. Duerch d‘Mathëllef vum Pirat Georges, dem Sandra Holmes an dem Kim Watson konnt de Fall Gott sei Dank a kierzester Zäit geléist an de Jan erëmfonnt ginn.

Um 1. Stack gouf wärenddeem e Manga-Workshop vun der lëtzebuerger Mangaka Sabrina Kaufmann ofgehalen. Mat gespëtze gouf gezeechent an e puer original japanesch Snacks hunn de Cours verséisst.

De ganzen Dag iwwer war d’Bibliothéik zu hire gewinnten Ëffnungszäiten op. Nieft den übleche Medien a Servicer konnten d’Notzer awer och dovunner profitéieren eist BESA-Kannerbuch ze entdecken a bei enger Tombola matzemaachen, bei där et flott Präisser ze gewanne gouf. Op eisem Themendësch ware fir dësen Dag Wierker vun den Auteuren a Kënschtler ausgestallt, déi Deel vun de Centenaires-Aktivitéite waren.

E weidere Programmpunkt war e Virtrag vum Zeechner Andy –ND!- Geenen, deen e Bléck hannert d’Kulisse vun der Bande Dessinée geworf huet. Wärend d’Nolauschterer nom Virtrag nach mam Andy gefachsimpelt hunn, gouf bausse vum Liessall schonn de Catering prett gemaach. Ausserdeem huet sech d’Band Zero Point Five opgebaut a prett gemaach.

Zum Ofschloss vum Owend war et Zäit fir de Vernissage vun enger neier Expo an der „Galerie am Trapenhaus“, déi zesumme mam Photo Club Esch entstanen ass. Domadder gëtt d’BESA dann och den Zepter wieder un e weidert honnertjäregt Gebuertsdagskand.

Zesummen huet d’Team vun der Bibliothéik (fir dësen Dag a fonkelneien, personaliséierten Tshirten an Hoodien erausgefiezt) de Gebuertsdagskuch ugeschnidden. An dono gouf mat alle Notzer gefeiert.

Zu gudder Lescht ass dësen Ofschloss och eng Plaz fir Merci ze soen: Merci jidderengem, deen eis am Laf vun dësem Centenaire begleet huet an en Deel dovunner war, egal op wéi eng Manéier. Et war e spannend Joer mat villen neien Aventurens an Erausfuerderungen.

Mär hoffen, dass et Iech gefall huet an hoffen Iech geschwënn bei eis an der Escher Bibliothéik erëm ze gesinn!

Merci!

Alexa, Georges, Jan, Kim, Daniela, Sandra & Tami
BESA-Team 02/03/2020

Léiwe Kleeschen, gudde Kleeschen…

6. Dezember. Den Dag vum hellegen Zinniklos. Deen Dag huet dëst Joer och ganz besonnesch an der Escher Bibliothéik ugefaangen: an zwar mat enger thematesch passender Liesung fir zwou Crèchen, déi d’Kim an eisem Kannereck, mat rouder Zipfelmutz um Kapp, gehalen huet.

Mee och déi aner Mataarbechter vum BESA-Team haten et sech net huele gelooss fir dës Geleeënheet hire schéinste Chrëschtdags-Pullover aus dem Schaf ze kromen.

Nomëttes war am grousse Liessall alles prett fir deen héije Besuch: de Kleeschen an den Houseker. A wéi eng Plaz géif sech besser eegene fir vum Kleeschen héchstperséinlech eng Geschicht virgelies ze kréien, wéi eng Bibliothéik? Gespaant hu kleng a grouss d’Geschicht vum Ieselche sengem Kaddo an nogelauschtert – natierlech kommentéiert vum Houseker, deen dem Kleeschen awer fläisseg beim Ëmbliederen assistéiert huet.

Kee vun deene klenge Besicher ass deen Dag eidel ausgaangen: eng 180 Kleeserchers-Titercher goufe verdeelt. All eenzel dovu war e Konschtwierk: agepaakt a Pabeier vum Weltbuttek a kreativ a mat vill Léift bemoolt vun de Schüler aus der Brillschoul.

Owes hu Kleeschen an Houseker sech dunn op de Wee gemaach op hiren nächsten Tour. Mär hoffen, dass si och d’nächst Joer nees Statioun bei eis an der Bibliothéik maachen!

Escher Jugenddag 2019

Mission Accomplished

Et ass zu engem feste Rendezvous am Kalenner vun de Kulturorganisatiounen zu Esch ginn: den Escher Jugenddag, organiséiert vum Escher Service Jeunesse. All Joers op ee Neits sinn hei eng sëllechen Organisatiounen op der Resistenz/Brillplaz vertruede fir de jonken Escher ze weise wat hir Stad alles u Kultur, Aktivitéiten, Sport an Zerwisser fir si ze bidden huet.

An och dëst Joer huet et sech d’Escher Bibliothéik net huele gelooss fir mat vun der Partie ze sinn. Eenzegen Ënnerscheed zu de Jore virdrunner? Mär hunn eis eege kleng Bibliothéik op dräi Rieder – eise Bibliambule – matbruecht. Et woar déi éischte Kéier, dass de Bibliambule e ganzen Dag am Zentrum vun Esch unzetreffe woar. An en hat definitiv Succès bei der Escher Jugend! An déi bequeem Hängematte konnt ee sech dran tesselen a gemitterlech an engem Buch ze stöberen, um Tablet oder Handy eppes nosichen oder einfach nëmmen eng kuerz Paus aleeën.

Bei esouvill Zoulaf a Erfolleg géife mär mengen: mission accomplished! A mär loossen d’Fotoen einfach fir sech schwätzen …

Kannerbuchliesung op der Brill Plaz

Um Samschdegmoien vum 20. Juli hate mär Rendez-vous mat der Autorin a Verleeërin Christiane Kremer fir eng weider Kannerbuchliesung am Kader vun eisem Centenaire.

Dës Liesung sollt ausserhalb vun eise Mauere stattfannen, a sou huet een Deel vun der Equipe an der Bibliothéik d’Stellung gehalen an deen Deel sech mat dem Bibliambule – eiser Bibliothéik op Rieder – op de Wee Richtung Brillplaz gemaacht.

Nodeems de Bibliambule mat senge Bicher an de bequemen Hängematten opgeriicht war, hu mär d’Sëtzgeleeënheete fir déi kleng Gäscht preparéiert.

Et goufen dräi flott Geschichte virgelies, zwou dovunner vum Christiane geschriwwen („Poli a Maisy“ a „So mol Lobo“), souwéi eng weider Geschicht, déi vum Christiane op Lëtzebuergesch iwwersat ginn ass („Di kleng Prinzessin : ech hätt och gär Frënn“).

D’Christiane huet mat Hëllef vun engem Kamishibai a verschidden Objeten d’Geschichten zum Liewen erwächt. Esou konnten d’Kanner, déi nogelauschtert hunn, Deel vun der Erzielung ginn an d’Personnage fir eng kuerz Zäit selwer verkierperen.

Obwuel et am Ufank e bëssen Hesitatioun gouf, huet sech de Public lues a lues mat klengen a groussen Nolauschterer gefëllt, déi wärend enger Stonn dovu profitéiert hunn sech an dräi nei Welt katapultéieren ze loossen.

No der Liesung konnt de Bibliambule nach ausféierlech getest ginn. Et war sécherlech net déi leschte Kéier, dass dësen zum Asaz koum.

Dëst Event op der Brill Plaz/Place de la Résistance huet der Bibliothéik erlaabt hirem Public ausserhalb vun de Bibliothéiksmauere méi no ze kommen an nei Connectiounen ze schafen.

Liesung mam Jhemp Hoscheit

Fir eise Centenaire huet sech och ee vun de bekanntsten Escher Auteuren, de Jhemp Hoscheit, d’Éier ginn an aus enger Rei vu senge ville Wierker („Wat wibbelt do am Schaf“,“Geschichten aus dem Zirkus“, „Kopplabunz“, „Op der Rees“, „De Schmunzel+“ a „Den Eppes“) virgelies.Den Auteur wousst seng jonk Nolauschterer mat senger lebendeger Erziel Aart a Weis vollkommen ze faszinéieren.

An och beim Bibliothéikspersonal konnt een dat eent oder anert Schmunzelen erblécksen, wärend si Klassiker aus hirer Kandheet erëmerkannt hunn. Verschidde vum Auteur sengen Zeile konnt deen oder anere souguer nach aus dem Gediechtnes matschwätzen.

Dësen Nomëtten huet fir all d’Nolauschterer e Stéck lëtzebuergesch Kannerliteratur lebendeg gi gelooss.