Posts Categorized: Aktivitéit

Ofschloss-Feierlechkeete vum Centenaire

Virun 100 Joer – den 2. Mäerz 1920 – sinn d’Diere vun der Gemengebibliothéik vun Esch offiziell opgaangen. Genau 100 Joer méi spéit, den 2. Mäerz 2020, stoung den Ofschloss vum Centenaire vun der Escher Bibliothéik aus dësem Grond ganz am Zeeche vun enger „Journée Portes Ouvertes“.

D’Villa Deitz, déi d’Bibliothéik zënter 1946 beheemegt, gouf fir dësen Dag extra erausgefiizt an dekoréiert. E neie Banner vir um Balcon huet d’Gäscht begréisst, Loftballonen un der Paart hunn hinnen de Wee gewisen, Loftschlaangen hunn d‘Trapenhaus verschéinert an op der Pinnwand am Gank huet eng Liichterketten d‘Fotoen aus deene vergaangenen 12 Méint presentéiert.

Den Ufank vum Dag huet eng „Mystery-Liesung“ gemaach: Fir déi jonk Nowuessdetektive gouf et e besonnesch urgente Fall ze léisen: eisen Erzéier a Photograph Jan gouf gekidnapped! Séier hunn sech kleng Gruppe gebild, déi mat detektiveschem Geschéck iwwerall an der Bibliothéik no Indice gesicht hunn. Duerch d‘Mathëllef vum Pirat Georges, dem Sandra Holmes an dem Kim Watson konnt de Fall Gott sei Dank a kierzester Zäit geléist an de Jan erëmfonnt ginn.

Um 1. Stack gouf wärenddeem e Manga-Workshop vun der lëtzebuerger Mangaka Sabrina Kaufmann ofgehalen. Mat gespëtze gouf gezeechent an e puer original japanesch Snacks hunn de Cours verséisst.

De ganzen Dag iwwer war d’Bibliothéik zu hire gewinnten Ëffnungszäiten op. Nieft den übleche Medien a Servicer konnten d’Notzer awer och dovunner profitéieren eist BESA-Kannerbuch ze entdecken a bei enger Tombola matzemaachen, bei där et flott Präisser ze gewanne gouf. Op eisem Themendësch ware fir dësen Dag Wierker vun den Auteuren a Kënschtler ausgestallt, déi Deel vun de Centenaires-Aktivitéite waren.

E weidere Programmpunkt war e Virtrag vum Zeechner Andy –ND!- Geenen, deen e Bléck hannert d’Kulisse vun der Bande Dessinée geworf huet. Wärend d’Nolauschterer nom Virtrag nach mam Andy gefachsimpelt hunn, gouf bausse vum Liessall schonn de Catering prett gemaach. Ausserdeem huet sech d’Band Zero Point Five opgebaut a prett gemaach.

Zum Ofschloss vum Owend war et Zäit fir de Vernissage vun enger neier Expo an der „Galerie am Trapenhaus“, déi zesumme mam Photo Club Esch entstanen ass. Domadder gëtt d’BESA dann och den Zepter wieder un e weidert honnertjäregt Gebuertsdagskand.

Zesummen huet d’Team vun der Bibliothéik (fir dësen Dag a fonkelneien, personaliséierten Tshirten an Hoodien erausgefiezt) de Gebuertsdagskuch ugeschnidden. An dono gouf mat alle Notzer gefeiert.

Zu gudder Lescht ass dësen Ofschloss och eng Plaz fir Merci ze soen: Merci jidderengem, deen eis am Laf vun dësem Centenaire begleet huet an en Deel dovunner war, egal op wéi eng Manéier. Et war e spannend Joer mat villen neien Aventurens an Erausfuerderungen.

Mär hoffen, dass et Iech gefall huet an hoffen Iech geschwënn bei eis an der Escher Bibliothéik erëm ze gesinn!

Merci!

Alexa, Georges, Jan, Kim, Daniela, Sandra & Tami
BESA-Team 02/03/2020

Graphic Novel Brunch

Dass „Bandes Dessinéen“ – kuerz „BDen“- bei Wäitem net nëmme fir Kanner geduecht sinn, mee och usprochsvoll Sujeten, déi eng déifgrënneg Recherche an Opbereedung brauchen, kënne behandelen, dovunner konnt ee sech e Sonnden,  de 15. Dezember, an der Escher Jugendherberg iwwerzeegen. Hei huet de fir d’Joer 2019 de leschten Event am Kader vum Centenaire vun der Escher Bibliothéik stattfonnt.

Den Zeechner Marc Angel huet et vum éischte Moment un verstanen, d’Zuschauer ze begeeschteren, dëst net nëmmen duerch säi lockert Optriede mee virun allem duerch seng immens pakend Aart a Weis fir iwwert seng Aarbecht ze schwätzen.

Dobäi gouf et vill Neies ze léieren: sou zum Beispill, dass déi wierklech Action sech an de wäisse Sträifen tëschent den Zeechnungen ofspillt an bei enger historescher BD op d’Genauegkeet vun den historesche Fakte vill Wäert geluecht gëtt, fir Anachronismen ze vermeiden.

De Marc Angel, deem säi Buch „De Jas“ elo och bei engem däitschen Editeur publizéiert gouf, huet unhand vun diverse Skizzen d’Evolutioun vu senge Wierker anschaulech erklärt an d’Defi’en wéi och de Facetteräichtum vu senger Aarbecht presentéiert.

No dësem Exposé mat uschléissender Diskussiounsronn, konnt sech de Public vum Brunch zerwéieren an ënnertenee fachsimpelen oder dovunner profitéieren sech vum Marc Angel eng Dedicace an eent vu senge Wierker zeechnen ze loossen.

Keine Angst in Andersrum

Dëst ass den Titel vum Olivia Jones sengem Buch. A genau dat war och d’Ziel vun dëser Liesung: Ängscht a Virurtdeeler virun deem wat „anescht“ erschéngt ofzebauen. Dofir hate mär d’Tatta Tom agelueden, och bekannt ënnert dem Kënschtlernumm „Séraphine Mirage“.

D’Tatta Tom huet fir Erstaunen bei de jonke Nolauschtrer gesuergt an zum Nodenken ugereegt. Ass dat wat traditionell als „normal“ gëlt ëmmer gülteg? Wat ass wann een sech aneschters spiert an ausliewe wëll? A wat ass wann d’Norm op d’Kopp gestalt gëlt?

Gedëlleg a mat vill Humor huet sech d‘Tatta Tom no der Liesung alleguer de Froen vum jonke Public gestalt.

Organiséiert gouf d’Liesung am Kader vun der Independent Little Lies Produktioun „Footnotes“.

Léiwe Kleeschen, gudde Kleeschen…

6. Dezember. Den Dag vum hellegen Zinniklos. Deen Dag huet dëst Joer och ganz besonnesch an der Escher Bibliothéik ugefaangen: an zwar mat enger thematesch passender Liesung fir zwou Crèchen, déi d’Kim an eisem Kannereck, mat rouder Zipfelmutz um Kapp, gehalen huet.

Mee och déi aner Mataarbechter vum BESA-Team haten et sech net huele gelooss fir dës Geleeënheet hire schéinste Chrëschtdags-Pullover aus dem Schaf ze kromen.

Nomëttes war am grousse Liessall alles prett fir deen héije Besuch: de Kleeschen an den Houseker. A wéi eng Plaz géif sech besser eegene fir vum Kleeschen héchstperséinlech eng Geschicht virgelies ze kréien, wéi eng Bibliothéik? Gespaant hu kleng a grouss d’Geschicht vum Ieselche sengem Kaddo an nogelauschtert – natierlech kommentéiert vum Houseker, deen dem Kleeschen awer fläisseg beim Ëmbliederen assistéiert huet.

Kee vun deene klenge Besicher ass deen Dag eidel ausgaangen: eng 180 Kleeserchers-Titercher goufe verdeelt. All eenzel dovu war e Konschtwierk: agepaakt a Pabeier vum Weltbuttek a kreativ a mat vill Léift bemoolt vun de Schüler aus der Brillschoul.

Owes hu Kleeschen an Houseker sech dunn op de Wee gemaach op hiren nächsten Tour. Mär hoffen, dass si och d’nächst Joer nees Statioun bei eis an der Bibliothéik maachen!

Escher Jugenddag 2019

Mission Accomplished

Et ass zu engem feste Rendezvous am Kalenner vun de Kulturorganisatiounen zu Esch ginn: den Escher Jugenddag, organiséiert vum Escher Service Jeunesse. All Joers op ee Neits sinn hei eng sëllechen Organisatiounen op der Resistenz/Brillplaz vertruede fir de jonken Escher ze weise wat hir Stad alles u Kultur, Aktivitéiten, Sport an Zerwisser fir si ze bidden huet.

An och dëst Joer huet et sech d’Escher Bibliothéik net huele gelooss fir mat vun der Partie ze sinn. Eenzegen Ënnerscheed zu de Jore virdrunner? Mär hunn eis eege kleng Bibliothéik op dräi Rieder – eise Bibliambule – matbruecht. Et woar déi éischte Kéier, dass de Bibliambule e ganzen Dag am Zentrum vun Esch unzetreffe woar. An en hat definitiv Succès bei der Escher Jugend! An déi bequeem Hängematte konnt ee sech dran tesselen a gemitterlech an engem Buch ze stöberen, um Tablet oder Handy eppes nosichen oder einfach nëmmen eng kuerz Paus aleeën.

Bei esouvill Zoulaf a Erfolleg géife mär mengen: mission accomplished! A mär loossen d’Fotoen einfach fir sech schwätzen …

Nuit de la Culture 2019

Fir d’Nuit de la Culture 2019 konnt een eis Bibliothéik ob dräi verschidde Plaze fannen:

 

Zum engen hate mir scho Méindes der Librairie Diderich Bicher fir an hier Vitrinn ausgeléint, déi all an der enger oder anerer Form mat der Thematik vum Waasser ze dinn haten – vun déieresche Waasserbewunner, iwwert Krimien an deenen dat naasst Element déidlech war, bis hin zu Klassiker wéi dem Jules Vernen säi „Vingt milles lieues sous les mers“. Sou goufen d’Leit schon Ufanks der Woch an eng aquaphil Stëmmung bruecht.

 

Op der Place Grobirchen wuare mer souguer nach éischter ënnerwee. Schonn am Summer hu Kanner aus den Escher Grondschoulen zesumme mat eis eng ganz magesch Zort Graffitie realiséiert, déi nëmme visibel gi wann et reent…. Falls Dir also am Laf vun de leschte Méint op dëser Plaz mysteriéis drésche Plazen op reeneregen Deeg begéint hutt, ass och dëst Geheimnis elo gelëft: dat wuare mär.

 

Awer och um Dag selwer wuare mär präsent: eise Bibliambule hate mär um Parking nieft der Eglise St. Joseph opgebaut. Ëm di 100 Visiteuren hu vun deem schéine Wieder profitéiert fir et sech an eisen Hängematte gemittlech ze maachen, e Buch ze liesen (natierlech och zum Thema Waasser!) oder einfach d’Sonn ze genéisse befiert et wieder gaangen ass an den Zentrum fir den Ofschloss vun dëser Editioun vun der Nuit de la Culture.

 

Bis d’nächst Joer op där nächster magescher Nuecht zu Esch!

Visites Guidées: Sur les traces de notre bibliothèque / Op de Spueren vun eiser Bibliothéik

Visites Guidées ‘ Sur les traces de notre bibliothèque’

Pendant le mois de juillet et dans le cadre de notre Centenaire se sont déroulées nos premières visites guidées « sur les traces de notre bibliothèque ». Beaucoup de spectateurs intéressés ont déjà eu l’occasion de visiter les lieux historiques dans lesquels la bibliothèque se situait auparavant.

Monsieur Liput a guidé le groupe en langue française à travers notre émouvante histoire. Il a su localiser les divers emplacements de la bibliothèque municipale au long de son histoire centenaire et la mettre dans le contexte de l’évolution de la Ville d’Esch.

Les visiteurs ont, par la suite, eu l’occasion de se rafraîchir autour d’un petit verre dans la salle de lecture de la bibliothèque actuelle avant de terminer la soirée par une visite guidée des lieux par un membre de notre équipe.

Intéressé ? Vous avez encore l’occasion de vous inscrire pour notre dernière visite le 31 août 2019.

Visites Guidées ‘ Sur les traces de notre bibliothèque’

Déi éischt Visites guidées am Kader vun eisem Centenaire hunn am Juli stattfonnt a vill Leit haten d’Chance sech déi Platzen unzekucke wou d’Escher Bibliothéik an hirer iwwer 100 Joer aler Geschicht schonn aquartéiert wuar. D’Madamm Valérie Sayrignac huet déi lëtzebuergesch Tour guidéiert an eis op eng Rees duerch eis beweegte Geschicht matgeholl, déi si och an de Kontext vun der Geschicht vun der Stad Esch ze setze wosst. No der Visitt gouf et an eisem aktuellen Doheem e klengt Glieschen zur Erfrëschung befiert mer den Owend ausklénge gelooss hunn bei engem Tour duerch d’Gebai deen exklusiv vun engem Member vun eiser Equipe geleet gouf.

Interesséiert? Där hutt nach ëmmer d’Geleeënheet Iech fir eis läscht Visitt vum 31. August 2019 anzeschreiwen.

Anders! Na und?

Buchvorstellung von Monique Philippart Schmitt

« Wir sind nicht alle gleich aber gleich viel wert. » Unter diesem Motto stellte Monique Philippart Schmitt ihr neuntes Buch in der Escher Bibliothek vor. Und genauso bunt und vielfältig wie die Buchprotagonisten war auch das Publikum. Ehrenplätze für die kleinsten Zuhörer waren natürlich in der ersten Reihe auf unserem blauen Teppich vorgesehen. Aber auch ansonsten waren alle Stühle und zusätzlich aufgestellten Sitzgelegenheiten bis auf den letzten Platz besetzt. Große wie kleine Zuhörer lauschten gebannt der Escher Autorin.

„Es ist schön, miteinander zu lachen, es ist nicht schön, über andere zu lachen“, mit diesem Fazit enden die Geschichten. Diese Aufforderung wurde auf jeden Fall umgehend beherzigt, denn es wurde am Abend vor allem viel miteinander gelacht.

Das Buch „Anders! Na und…“ kann ab sofort käuflich erworben werden und findet sich natürlich auch auf den Regalreihen der Escher Bibliothek.

Ee “blind date” mat Bicher …

Touch me. Blind date with a book.

„Les cinq sens du livre – Mat alle Sënner liesen » esou waren d’Journéees du Livre et du Droit d’Auteur fir d’Editioun 2019 iwwertitelt.
Fir d’éischte Kéier sollte nieft deenen onsëllegen lokalen, och 4 regional Manifestatioune stattfannen, bei deenen déi ënnerschiddlechen Acteuren vum Buchsecteur invitéiert waren zesummen ee méi grousst Evenement organiséieren.
Well dës Form vun Zesummeschaffen ganz kloer bei eis Institutioun a virun allem och an den Esprit vun der stratégie culturelle „Connexions“ passt, huet d’Escher Bibliothéik an hirem Gebuertsdagsjoer d’Koordination fir den Event am Süden iwwerholl.
No enger éischter Réunioun mat deenen éischte Partner war d’Iddie vun engem « blind date with books » gebuer. Wat geschitt wann een net mat den Ae liest? Wann ee genau dëse Sënn ewechléisst? Mat welche Sënner kann ee soss nach Bicher entdecken a sech op Texter aloossen?

Dorobshin sinn am Laf vun der Zäit ëmmer méi Partner dobäigestouss. Mam Centre culturel régional opderschmelz zu Diddeleng hu mär déi ideal Plaz fonnt, déi et engersäits erméiglecht huet verschidde Stänn am Grand Auditoire unzebidden, an anerersäist owes am Ciné Starlight eng ganz besonnesch Form vu Kappkino ze presentéieren.

Vun Audioquizz, Hörspillbibliothéik, Bicherdësch, Boîte à histoires, Lieseck, Brailleschrëft bis Kannermärecher war fir all Sënn eppes dobäi. Net ze vergiessen d’Cupcakes ganz am Journées du Livre-Look, déi eis de Nomëtten verséisst hunn.
Besonnesch frou si mär iwwert dat neit Wëssen an all déi nei Kontakter déi duerch dëse Projet entstane sinn a geknëppt goufen. Mär sinn immens gespaant welch nei Synergien an Zukunft dorauser entstoe wäerten.
E grousse Merci un all d’Partner, déi zu dëser Manifestatioun bäigedroen hunn: Centre culturel régional opderschmelz, Bibliothèque publique régionale de Dudelange, Bibliothèque municipale de Differdange, Escher Bibliothéik, Centre National Audiovisuel , Librairie Diderich, Radio ARA, Service Jeunesse Esch, Zoom éditions, Centre pour le développement des compétences relatives à la vue , Fondation Lëtzebuerger Blannevereenegung.

Merci och der Ville de Dudelange fir hir Ënnerstëtzung an der Bibliothèque nationale de Luxembourg fir d’Gesamtkoordinatioun.

Menu d'accessibilité

Taille de police
Zoom